សិង្ហបុរី៖ ក្នុងអំឡុងពេលនៃដំណើរទស្សនកិច្ចលើទឹកដីសិង្ហបុរី កាលពីថ្ងៃទី១៨ ខែមិថុនាម្សិលមិញនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញទស្សនាសួនឧ្យានជាតិផ្កាអ័រគីដេ National Orchid Garden ដែលនៅទីនោះ ថ្នាក់ដឹកនាំនៃឧទ្យានជាតិអ័រគីដេបានប្រសិទ្ធនាមជាកិត្តិយសឈ្មោះសម្តេចមហាបវរធិបតី ហ៊ុន ម៉ាណែត នូវផ្កាអ័រគីដេមួយប្រភេទ ដោយមានការជូនវិញ្ញាបនបត្រជូនសម្តេចធិបតីផងដែរ។

គួរឱ្យដឹងថា ​ផ្កាអ័រគីដេ​ដែលត្រូវបានប្រសិទ្ធិនាមដោយឈ្មោះរបស់សម្តេចមហាបវរធិបតីខាងលើនេះ ត្រូវបានពិពណ៌នាថាគឺ​ជា​កូនកាត់​ផ្កាអ័រគីដេ​ដែលស្រស់ស្អាត មានភាព​ទាក់ទាញ និង​មាន​ចេញផ្កា​ដោយ​សេរី។ ទងផ្កាអ័រគីដេនេះមានភាពរឹងមាំ និងត្រង់ដែលអាចមានប្រវែង ២៥ ទៅ ៣៥សង់ទីម៉ែត្រ និងមានផ្កា ១២ ទៅ ២០ផ្កា នៅលើទងនីមួយៗ។ ទំហំផ្កានីមួយៗមានទទឹងប្រហែល ៦សង់ទីម៉ែត្រ​ ដែលមានក្លិនបែបផ្កាម្លិះស្រាល។ ស្រទាប់ផ្កាមាន​​ពណ៌​ស្វាយ​ដិត និងស្វាយស្រាល ស្រដៀង​ទៅនឹងផ្កាឡាវេនឌ័រ។ 

ផ្កាអ័រគីដេនេះត្រូវបានដាក់ឈ្មោះតាម សម្តេចមហាបវរធិបតី ហ៊ុន ម៉ាណែត ក្នុងឱកាសដែលសម្តេចអញ្ជើញទស្សនាសួនផ្កាអ័រគីដេជាតិនៃប្រទេសសឹង្ហបុរី នៅថ្ងៃទី១៨ ខែមិថុនា ឆ្នាំ២០២៤  ដែលមានឈ្មោះជាភាសាបរទេសថា Vanchoanthe Hun Manet។

គួរបញ្ជាក់ផងដែរថា ពិធីប្រសិទ្ធិនាមឈ្មោះផ្កានៅក្នុងឧទ្យានជាតិអ័រគីដេ​របស់សិង្ហបុរី ត្រូវបានគេមើលឃើញថាជាកាយវិការបង្ហាញពីការបង្កើនសហប្រតិបត្តិការលើទំនាក់ទំនងជាមួយបណ្ដាប្រទេសផ្សេងៗ ជាក់ស្ដែងថ្នាក់ដឹកនាំជាន់ខ្ពស់ជាច្រើនរួមមាន ​​អតីត​​ប្រធានាធិបតីអាមេរិក លោក Barack Obama និងភរិយា, ប្រធានាធិបតីហ្វីលីពីន លោក Ferdinand Marcos Jr និងភរិយា ក៏ដូចជានាយករដ្ឋមន្រ្តីវៀតណាម លោក Pham Minh Chinh ជាដើម សុទ្ធតែធ្លាប់ត្រូវបានប្រសិទ្ធិនាមឈ្មោះលើប្រភេទផ្កាអ័រគីដេ អំឡុងដំណើរទស្សនកិច្ចក្នុងប្រទេសសិង្ហបុរី៕